Удмурт текстысь предложениослэн герзаськон амалъессы

8-9 классъеслы «Удмурт кыл» учебникын пусъемын:

« Предложениос куспазы кык амалэн герзасько:

1. Предложениос артысь артэ интыясько. Соосты одиг тема герза.

Гуртлы нокыче кышкытлык овол кадь. Огыр-бугыр овол. Калык полын шугъяськыса, дыртыса бызьылон уг адзиськы.

2. Предложениос куспазы герзасько борсьысь борсе, жильыяськыса.

Вуиз шуныт гужем. Сое ми уката но возьмамы.

Предложениос куспзы борсьысь борсе герзасько ке, соку нимысьтыз герзет кылъес кутисько:

1. Союзъес.

Котькинлэн кылэмез вань, дыр, нефть сярысь. Нош тодэмды ке потэ, сое му вой шуо.

2. Местоимениос но наречиос.

а) Памятниклэн выжыяз гуртысь бырем воргоронъеслыэн нимтулъессы гожтэмын. Соос полын вань Юлялэн бубизлэн фамилиез.

б) Гурт пумын паллян ки вылаз каскаен но пельпумаз автоматэн солдат сылэ. Озьы со Быдзым Отечественной войнаын быремъесты буре вае.

3.Синоимъес.

Асьме палан трос гинэ кионъес. Та пойшуръес кескичесь но кышкытэсь.

4. Антонимъес.

Оген мыныку, вакчи сюрес но кузь потэ. Эшен вамышъяку, кузь сюрес но вакчи потэ.

5. Вераськон люкетъеслэн огвыллем формаоссы:

а) глаголлэн дыр формаосыз:

Кыдекын станциын тепловозлэн арганлэн кадь куараез шуккиське… Мелькомбинатлэн ужамез кылиське.

Кыкез но глаголъес али дыр формаен кутэмын.

б) причастилэн огвыллем формаосыз:

Кузеосыз но юрт озьы ик кылиз. Капкаез бекырскемын, укноез чоксамын. Укно улись садкенер тиямын.

в) существительнойлэн огвыллем формаосыз:

Сергей Микол адзе: сяськаос малы ке чырмытэсь овол. Бурдъессы лэземын. Куаръессы вылысь лысвуос толзиллям» [Удмурт кыл 2003: 10-11].

Г. А. Ушаковлэн, В. М. Ившиналэн но В. М. Сельченковалэн чакламзыя, предложениос кык пумо амалэн герзасько:

1) пуштроссы ласянь. Предложениос пуштроссыя матынэсь, кыче ке но одиг учырен, арбериен яке валатонэн герзаськемын.

Яке таче пример:

«Зэм но, Потаповалэн улонэз, тунась чиган кышнолэн верамез выллем, жог воштиськиз. Анна Игнатьевналэн юрттэмезъя, одиг квартира шедьтиз, ачизъя тупамон карт но кемдиз: жужыт, кужмо, ужа строитепьствоын. Ма кулэ на? Бадзым дышетскем муртъес, начальникъес ваньмызлы уг тырмо ук!» [Архипов 1984: 249].

Сетэм текстысь предложениос пуштроссыя гинэ герзасько шуыны луоз.Контекстэк соосты валаны шуг луысал.

2) кыл ласянь. Таоссэ куинь группалы люкыны луоз:

а) лексической:

-одиг кылэз трос пол кутон

«Акагуртэ лыктись мурт нырысь ик Макарлэсь корказэ адзоз. Акагурт вырйылын сылэ. Нялмыт жутскись Глей бамалти Макарлэн коркаезлэн муръе йылыз адскыны кутске…» [Красильников 1976: 4].

Яке тани таче пример:

«Музъем. Огшоры музъем. Мар быдза шуд, макем усто шумпотон вайыны быгатэ со адямилы!» [ Архипов 1984: 6].

-одиг кадь корене портэм вераськон люкет луись кылъесты кутон

«…Ярдуре шукыръяськем бервылъесыз кылизы: сумед луо, улвайес, пильылиськем йоос. Со йо пырыос шунды шорын кема шунаны выризы, шунам ву шуре векчи чуръесын тергетыса вияз» [Красильниквов 1976: 54].

Таче примеръес шер пумисько.

в) родо-видовой кусып тупатись кылъесты кутон. Нырысь кутиське огъя значениен кыл, собере - частной.

«Корка пушкысь тирлыкез Зоя ас тодэмезъя пуктылиз. Ос дорын ик гурезь жужда тырем миндэръесын, чилясь шарикъесын койка сылэ. Койка бордысен кутскыса, жок котырти паськыт зус» [Красильников 1976: 6].

Яке таче примерез кутом:

«Лукерья апай восьтэт мугоро кышномурт. Киосыз бадзымесь. Кырымпыдэсыз жотырес. Суйесыз зугы кадь, сонъес гинэ. Ымныр солэн котьку толамын» [Архипов 1984:46].

-одиг темаен герзаськем кылъесты кутон

Кылсярысь:

«Олексан нырысьсэ учкиз Галялэн ымныраз. Солэн нырыз чатыресгес, пичи гинэ, синъесыз лызэсьгес, серекъяса но задорен учко Олексан шоры»[Красильников 1976: 64].

Яке:

«Жок вылэ азьвыл ик сиен-юон пуктылэмын вылэм ини. Нимысьтыз жуко мильым дасяллям. Ваньбуро адямиос зазег сильын плозьто жуксэс» [Архипов 1984: 149].

-лексической но контекстуальной синонимъесты кутон.

Кылсярысь:

«Бригадаын дышизы ни: гырем участок шоры пал синмыныз учкыса, Горд Коля олома сямен, чик мертатэк шонер вераны быгатэ.

Юаськод: «Коня луоз, Коля?» Учетчик синзэ кыньыртыса вера: «Укмыс но дас вить сотка» [Красильников 1976:778].

«Горд Коля» но «учетчик» контекстуальной синонимъес луо.

Яке:

«Кошкон азяз Николай Николаевич, ваче син учкыса, Кузьминэн вераськиз на. Лыктэм муртлы валантэм вал, малы Кузьминлэн райсельхозтехникаез сокем урод. Со сярысь ик со юаз но» [Архипов 1984: 161-162].

Контекстуальной синонимъес луо «Николай Николаевич», «лыктэм мурт», «со». Нимаз эскерыса, та кылъесты синоним шуыны уз луы.

-фразеологизмъсты кутон:

«…Галялэн паймыса учкемезлы пумит вераз: «Со чурыт куртчемъес колодчазэс замокаллям. Ваньзы мед гуньдозы!» - «Кинъес озьы, Марья кенак? - «Ма тани артэ коркан улисьесмы, Кабыш шуонъес…» [Красильников 1976: 28].

Яке:

«Доска азьысен тынэсьтыд юалляськыны кутско ке, мон кытчы пырыны ик уг шедьтиськы. Му пыр виясал. Тынэсьтыд овол, мынэсьтым юало кадь» [Архипов 1984: 122].

Синонимъес но фразеологизмъес текстын кутисько одиг кылэз трос пол кутонлэсь мозмытскон понна но., веранлэсь чеберзэ но яркытсэ будэтон понна но, арбери яке герой сярысь маар ке выльзэ будэтыса веран понна но.

-текстлэсь пуштроссэ пумит карон понна кутисько антонимъес. Со дыре ик соос предложениосты но герзало.

«Сюанзы бере вить толэзь ортчыса, Зоялэн нылыз вордиськиз: паськыт ныро, чиль- чиль сьод синмо - кисьтэм кадь ик Миколлы кельше. Кема оз улы, коткыль йотыса кулиз» [Красильников 1976: 10].

Яке таче пример:

«Вот со кошкоз, вот со мукет пала берытскоз… Володялэн бордонэз ымдураз ини. Чапак со куспын… Володялэн ымдуръесыз соку ик пель дорозяз вуизы» [Архипов 1984: 130].

б) лексико-грамматической яке морфологической. Предложениосты куспазы герзаны юртто нимвоштосъес, сямкылъес, кылпырыос, герзетъес. Лексико-грамматической амал чемгес кутиське предложенилэн цепной амалэн радъяськемез дыръя, куке предложениос борсьысь борсе жильыяськыса кадь кошко.

Кылсярысь:

«Олексан таза мугоро будиз. Пичи дыръяз Макар сое туж нуныя но мусоя вал» [Красильников 1976: 10].

Та примерын «Олексан» макеним воштэмын «сое» нимвоштосэн - озьы предложениос ог-огенызы герзасько.

Яке таче пример:

«…Соос полын вал чош дышетскись эшез Надя. Гажаса, мусояса, шуныт, небыт сямыныз пыриз со егит пилэн улоназ. Собере ини ачиз Кузьмин, китиз кутыса сямен, ас малпам сюрестиз нуиз» [Архипов 1984: 201].

Нырысети но кыкети предложениос герзасько «Надя» кыл интые «со» местоимениез кутыса, нош соос борды куинетиез итиське «собере» герзетэн.

в) синтаксической. Текстэз огазеяло предложениослэн структуразыя огкадь луэмзы, предложениосын кылъеслэн интыяськемзы, глагол-сказуемойеслэн видзы но дырзы ласянь огкадь луэмзы. Синтаксической амал кутиське предложениос параллельно радъяськыку, куке котькуд предложениын портэм арбериос, учыръес сярысь верамын но соос одиг малпанэз усьто.

Кылсярысь:

«Богданов лиятыны выре, ымзэ чокта. Нылмурт урмиз. Синъесыз пияла кадесь луизы. Куалекъя, черекъя» [ Архипов 1984: 215].

Яке:

«Марина со шоры уг учкы ни. Ангессэ бур киын пыкъяса пуке. Жоккышетэн одиг пужымез шоры жальмаса улэ» [Архипов 1984: 215].

Кыказ но примерын глаголъесын али дырын, одиглыко видэн.

Озьыен, текстысь предложениос портэм амалъесын куспазы герзасько. Чемысь кутиськисьесыз полы пыро:

1) лексической: одиг кылэз трос по кутон, лексической но контекстуальной синонимъесты кутон;

2) морфологической: нимвоштосъесын, сямкылъесын, герзетъесын;

3) синтаксической: глагол-сказуемойлэн формаосыныз;

4) пуштроссы ласянь.



§4. Вераськон кылысь предложениослэн куспазы герзаськон амалъессы

Кыл кык формаен улэ - гожъяськон но вераськон. Вераськон кыл официальной но неофициальной вераськонын кутиське. Неофициальной вераськонэз огшоры вераськон кыл шуо.

Вераськон кыллэн, О. Б. Сиротининалэн пусъемезъя, валтись аспортэмлыкъесыз полы пыро:

- устной формаен луэмез;

- чем кутиськись диалог амал;

- веран дасямтэ луэ;

- вераськонлы юртто мимика, жестъес но интонация.

Вераськон кылэз литературной кыллэн нимысьтыз люкетэз луыса 20-ти даурлэн 50-ти аръсаз дышетыны кутскизы. Но диалектологъес сое эскерыны кутскизы ни 19 дауре ик [1974: 3-8].

Т. А. Ладыженская пусъе на мукетсэ но. Со вера: вераськись муртъес ог-огзэс кыло но, чемысь адзо но. Соин ик валтись инты басьто кылон но мимика, жестъес, интонация[1963: 3].

Художественной текстъесын сямен ик, вераськон кылын предложениос ог-огенызы герзаськемын луо.

Дышетскисьеслэсь вераськон кылзэс эскерыса, Т. А. Ладыженская пусъе, предложениосты герзан понна чем кутисько повторъес шуыса. Мукет герзаськон амлъес шер кутисько. Озьы ик Т. А. Ладыженская пусъе на мукетсэ но: вераськон кылын предложениос чемысь интонациен герзаськемын уг луо. Нимысьтыз предложениос вискын интонационной кусыпъес овол [1963: 25-26].

Г. Я. Солганик вераськон кыллэсь куинь аспортэмлыксэ пусъе:

1) вераськись муртъес викын официальной кусыпъес луыны кулэ овол. Кык эшъеслэн но дышетисен дышетскисьлэн вераськоназы бадзым портэмлыкез вань.

Чошатом таче кык веранъесты:

- Чырткем, Юрка, султид-а ни?

Яке:

- Зечбуресь, Юрий. Вождэс эн вае таче вазь жингыртэме понна. Мон тиледыз ой сайкаты-а?

Официальной кусыпъес вошто веранлэь стильзэ, вазиськонлэсь формазэ, предложениослэсь радзэс.

2) верась но кылзись мурт вискын медаз луы «куинети» адями;

3) веран дасямтэ луэ, сои ник пумиське одигзэ кык пол юан, верась муртлэн кыл висказ пырон но мукет. Дасямтэ веранэн герзаськемын мимикаез, жестъесты, интонациез уже кутон [2003: 178-180].

«Эллиптичность - один из основных принципов построения разговорного текста,» - пусъе О. Б. Сиротинина. Верськон кылын полной предложениос туж шер кутисько. Веранысь мае гинэ куштыны луэ, ваньмыз усе. Озьыен вераськон кылын предложениос чемысь пуштроссыя гинэ герзасько [1974: 101-102].

Научной литератураез эскерыса, вераны быгатиськом: огшоры вераськон кылын предложениос таче амалэн герзасько:

1) повторъесын;

2) пуштроссыя;

3) присоединительной амалэн;

4) куд-ог учыре вераськон кылын предложениос герзаськемын уг луо.

Та ужамы ми эскерим огшоры вераськон кылысь предложениослэсь герзаськон амалъессэс. Информантъес полын вал студентъес, преподавательес но гуртын улисьес.

Гожъяськон кылын сямен ик, вераськон кылын но пумисько портэм пумо герзаськон амалъессэс:

1. Предложениослэн пуштроссыя герзаськемзы.

Кылсярысь:

Куазь шуныт. Пиштэ шунды, но со сыче яркыт, сутись овол ни. Турын-куар чужектэ (Денисова С. Н., УдГУ-ысь студентка, 4-ти курс, 21 арес).

Предложениос куспазы пуштроссыя гинэ герзасько, сос куазьлэсь воштиськемзэ возьмато.

2. Предложениослэн лексической, морфологической, синтаксической амалъесын герзаськемзы.

а) лексической:

-одиг кылэз трос пол кутон:

Тоня Платонова но Матвеев вискын конфликт уг ужа ни. Тоня Платонова нюръяське баптистъесын (Зайцева Т. И., УдГУ-ысь преподаватель).

Яке:

Сюанын мойы калык трос луэ вал. Мойы калык ортчытэ вал. Сизьым пол ветло вал. Юаны ветло. Муминыз, аиныз, родственникенызы ветло вал. Ветылды вузаны вань шуо вылэм. Сюан лэсьто вал но коркась корка юмшаса Вань родственникъессы доры ветло вал (Семенова Т. И., гуртын улись, вордскемын 1933 арын, дышетскемез среднеспециальной).

Та люкетын туж трос повторез: мойы калык, ветло, родсвенникъес, вал юрттись каронкыл туж чем кутиське.

-лексической но контекстуальной синонимеъсты кутон:

Выли квалификациен специалист - Федор Григорьевич. Автор возьматэ «профессионально несостоявшегося человека». Пиосмурт синмын улон шоры учкон (Глухова Г. А., УдГУ-ысь преподаватель).

Контекстуальной синоноимъес луо: Федор Григорьевич, профессионально несостоявшийся человек, пиосмурт.

-фразеологизмъесты кутон:

Опять Имполит Толик кенермес тиям. Суам бам, мар ужамзэ но уг вала (Вахрушева Н.Н., гуртын улись, 51 арес, дышетскемез среднеспециальной).

Та примерын Имполит Толик кыл воштиське суам бам фразеологизмен.

Художественной текстын сямен ик, вераськон кылын но синонимъес но фразеологизмъес кутисько повторлэсь мозмытскон понна. Озьы ик соос веранэз чебер, яркыт каро.

б) лексико-грамматической яке морфологической. Кылсярысь макенимез нимвоштосэн воштон:

Та дискета озьы ик ветлэ таре. Мон вунэткем сое поныны. Урод луоз ни со таре (Вахрушева О. В., УдГУ-ысь студентка, 4-ти курс, 21арес).

Яке таче пример:

Таче амалэн висъяло союзо но союзтэм сложной предложениосты. Собере предложениосты сложносочиненнойлы но сложноподчииненнойлы (Шутов А.Ф., УдГУ-ысь преподаватель).

Таяз учыре предложениос куспазы герзасько «собере» герзетэн.

в) синтаксической.

Кылсярысь, глагол-сказуемойлэн огкадь дыр но вид формаез:

Чошатон грамматика кылъеслэсь структуразэс чошатыса эскере. Чошатыса эскерыку, кык метод вылэ пыкиське: нырысетиез - историко-сравнительной, кыкетиез - историко-сопоставительной (Самарова М. А., УдГУ-ысь преподавтель).

Кыказ но предложениын глагол-сказуемой али дыр формаен кутиське.

Озьыен, пусйыны быгатиськом: вераськон кылын но предложениос портэм амалэн герзаськыны быгато. Чемгес кутиськисьесыз полы пыро: предложениослэн пуштроссы ласянь герзаськемзы; лексической: одиг кылэз трос пол кутон, синонимъесты кутон; морфологической: нимвоштосэн герзаськон, герзетъесты кутон; синтаксической: глагол-сказуемойлэн формаосыныз. Но гожтэм текстын но, вераськон кылысь текстын но вань предложениос одиг опртэм амалэн гинэ уг герзасько. Бадзым текстъесын портэм пумо амалъес пумисько.

Кылсярысь, художественной литератураысь таче текст кутом:

«Котькуд нунал, час, минут - весь малпасько со сярысь. Котыръесы - эшъесы, чыжы-выжыосы - яратоно адямие сярысь ваньзы тодо. Туннэ одиг ар, кызьы ми чошен. Тани-тани со дорам вуоз. Мон туннэ туж чебер. Со гинэ тодэ, пумиськыкумы кыче яркыт тылгизьыосын синъесы жуатско»[Имполитова 2006: 13].

Та текстысь предложениос таче амлэн герзасько:

1) макеним интые нимвоштос кутыса: со - яратоно адямие;

2) повтор амал: со макеним куинь предложениын пумиське;

3) нырысети но кыкети предложениос конструкцизыя огкадесь луо: однородной членэн предложениос;

4) нырысети, кыкети но куатети предложениосын глагол-сказуемой али дырын кутиське;

5) вань предложениос одиг темаез усьто.

Яке таче пример басьтом:

«Мылкыд но, малпанъес но ялан сурасько, зугасько. Кытчы ке ялан кыстисько. Эсьма, керзегъяськыны кутски ни. Сизьыл куазьлы, буелъеслы шумпотыса. Чук бус полы ышыны, выжыкыл дуннеын кадь вамышъяны кыче-кыче кельше вал… Нош табере сюлэм мозмонэн тырме. Тулысэз но мон азьвыл тулысэз кадь, гужемез но гужемез кадь адзисько вал, нош табере ог-огзылэсь чик уг висъясько, жог ортчись адями гумыр кадь пото: вордиськид, быдэ вуид, пересьмид но - улонэд толзем. Шим-шим кылем сад выллем луиз. Иське, марлы кулэ вал та улон сюресэз ортчыны?» [Павлов 2004: 49].

1) нырысети но куатети предложениосысь глагол-сказуемойес одиг макеез валэкто - «малпанъес» макенимез;

2) 1, 2, 3, 5, 6, 7-ти предложениосын глагол-сказуемойес али дырын кутисько;

3) ньылети но куатети предложениосын глагол-сказуемой тодмо ортчем дыр формаен кутиське;

4) предложениосты герзаны юртто «эсьма» но «иське» модальной кылъес;

5) повтор амал (витети но куатети предложенисын): «нош табере».

Эскером таче примерез:

«Солэн кырзанъесыз туж жог бурдъясько, мылкыдэ пычало. Ог ньыльдон ар гожъя ни со кылбуръес, соос уно овол, но ваньмыз калыке волмемын. Геннадий Николаевичлы 1 мартэ 60 арес тырмиз. Композитор вордскиз но будиз Пичи Пурга районысь Ильинское селоын. Йылпумъяз Ижевскысь музыкальной училищеезно пединститутэз, кивалтиз Пичи Пургаысь но Глазов районысь Качкашур калык хоръесын, дышетскыса пырпотиз пединститутлэсь музыкальной факультетсэ. Уно аръес чоже ачиз но отын ик дышетэ» [1990: 64].

Предложениос куспазы таче амалэн герзасько:

1) макенимез нимвоштосэн воштыса: со, сое, солэн, ачиз нимвоштосъес кутисько;

2) контекстной синонимъесын: Геннадий Николаевич - композитор;

3) глагол-сказуемой али дырын кутиське.

Чошатон понна кутом на вераськон кылысь прмеръес:

Гуртысь адямиез азьло лушкаса нулло вылэм. Байков ульчаети мынэ вылэм но, одиг коркан туж шулдыр юондыр, пе. Пыреем но, сюдо, сектало, пе. Оломар гинэ верам но, бусыын маял вылын, пе, кыллисько. Валаса-мараса пегзем (Казаков А. И., гуртын улись, вордскемын 1925 арын, дышетскемез 6 класс).

Предложениос таче амлэн герзасько:

1) повтор амалэн: «пе» модальной кыл куинь предложениын пумиське;

2) глагол-сказуемой тодмотэм ортчем дырын кутиське.

Яке таче пример:

Война дыръя мон заводын инь ужай. В 39-м мон кутки ужаны, кутэн мыни вал. Серовно гуртын уж овол. Сэре по 47-ой ужай но кошки. Котькыче секыт мед луоз, совхозын ужало. В 48-м басьтизы парсьгидэ. Кык ар ужай, сэре

курег гидэ басьтизы (Иванова А. С., гуртын улись, вордскемын 1924 арын, дшетскемез 7 класс).

Предложениос таче амлъесын герзасько:

1) повтор;

2) союзэз уже кутыса.

Озьыен, примеръесты эскерыса, пусйыны быгатиськом: художественной литератураысь текстъесын но огшоры вераськон кылысь текстъесын но предложениос портэм амалэн герзаськыны быгато. Гожъяськон кылын чошатыса, вераськон кылын предложениослэн герзаськон амалзы луыса, чем кутиське повтор. Мукет герзаськон амалъес шер кутисько.

Художественной литератураын предложениос куспазы герзаськыны быгато портэм амалъесын.



Йылпумъян

Озьыен, текст - со ивортон, кудиз пуштросэзъя но структураезъя быдэсмемын луэ но кудаз шодиське авторлэн ивортонлы отношениез. Текстысь предложениос куспазы юн герзаськемын луо.

Текстлэн валтись тодметъесыз полы пыро:

5) текст маке сярысь ивортэ;

6) текстлэн валтись люкетэз - сложной синтаксической целой;

7) текстысь предложениос куспазы юн герзаськемын;

8) текст гожтэмын но верамын но луыны быгатэ.

Текстлэн валтись люкетъесыз: прдложениос, сложной синтаксической целой, фрагмент, главаос, томъес но мукет.

Текстысь предложениос портэм амалъесын куспазы герзасько. Чемысь кутиськисьесыз полы пыро:

1) лексической: одиг кылэз трос по кутон, лексической но контекстуальной синонимъесты кутон;

2) морфологической: нимвоштосъесын, сямкылъесын, герзетъесын;

3) синтаксической: глагол-сказуемойлэн формаосыныз;

4) пуштроссы ласянь.

Портэм типъем текстъесысь предложениос вань герзаськон амалъесын герзаськыны быгато. Но повествование типъем текстъесысь предложениос чемысь герзасько: глагол-сказуемойеслэн дыр фрмаосынызы, повтор амалэн, лексической но контекстной синонимъесын, герзетъесын, макенимез нимвоштосэн воштыса; описание типъем текстын кутисько повтор амал, макенимез нимвоштосэн воштон, герзетъесын, чемысь пумисько сыче текстъес, кытын предложениос пуштроссыя гинэ герзаськемын луо. Рассуждение типъем текстъесын предложениослэн герзаськон амалъессы полы пыртыны быгатиськом синонимъесты, герзетъесты но повтор амалэз.

Вераськон кылын но предложениос портэм амалэн герзаськыны быгато. Чемгес кутиськисьесыз полы пыро: предложениослэн пуштроссы ласянь герзаськемзы; лексической: одиг кылэз трос пол кутон, синонимъесты кутон; морфологической: нимвоштосэн герзаськон, герзетъесты кутон; синтаксической: глагол-сказуемойлэн формаосыныз. Но гожтэм текстын но, вераськон кылысь текстын но вань предложениос одиг опртэм амалэн гинэ уг герзасько. Бадзым текстъесын портэм пумо амалъес пумисько.

Примеръесты эскерыса, пусйыны быгатиськом: художественной литератураысь текстъесын но огшоры вераськон кылысь текстъесын но предложениос портэм амалэн герзаськыны быгато. Гожъяськон кылын чошатыса, вераськон кылын предложениослэн герзаськон амалзы луыса, чем кутиське повтор. Мукет герзаськон амалъес шер кутисько.

Художественной литератураын предложениос куспазы герзаськыны быгато портэм амалъесын.



Библиография

Научной литература

1. Байтерякова Ю.Т., Данилова Р.И. 1-4 классъесын удмурт кыллы дышетон программа // Вордскем кыл. 2002 № 1 - 95с.

2. Валгина Н.С. Теория текста.: Учебное пособие. М.: Логос, 2003 - 280.

3. Валгина Н.С. Синтаксис современного русского языка. Учебное пособие. М.: Агар, 2000 - 416с.

4. Величко Л.И. работа над текстом на уроках русского языка: Пособие для учителя. М.: просвещение, 1983 - 128.

5. Виноградов В.В. Лингвистические основы научной критики текста // Вопросы языкознания. 1958 № 3.

6. Ворожбитова Н.С. Теория текста. Антропоцентрическое направление: учебное пособие для вузов. М.: Флинта, Наука, 2007 - 520с.

7. Гальперин И.Р. О понятии «текст» // Лингвистика текста: Материалы научной конференции. М.: 1974. Ч.1.

8. Горбушина Г.В. Кылэз волятон урокъесын текстлэсь кылтирлыксэ эскерон бордын ужн // Вордскем кыл. 2002 № 2 - 95с.

9. Горбушина Г.В. Текстын предложениосты куспазы герзась лексической амалъес // Вордскем кыл. 2002 № 2 - 95с.

10. Ладыженская Т.А. Анализ устной речи учащихся 5-7 класса. М.: Издательство АН педагогических наук РСФСР, 1963.

11. Ладыженская Т.А. Устная речь как средство и предмет обучения: Учебное пособие. - М.: Флинта: Наука,1998.

12. Лингвистический энциклопедический словарь / Главный редактор В.Н. Ярцева. М.: Советская энциклопедия, 1990 - 685.

13. Лосева Л.М. Как строится текст: Пособие для учителей / Под редакцией Г.Я. Солганика. М.: просвещение, 1980 - 94.

14. Попов Ю.П., Трегубович Т.Г. Текст: структура и семантика. Минск: вышэйшая школа, 1984 - 188.

15. Поспелов Н.С. Сложное синтаксическое целое и основные особенности его структуры // доклады и сообщения института русского языка. Выпуск 2. М.: 1948.

16. Сиротинина О.Б. . Устная речь как средство и предмет обучения: Учебное пособие для педагогических институтов. М.: «Просвещение», 1974 - 144с.

17. Скобликова Е.С. современный русский язык. Синтаксис сложного предложения (теоритический курс): учебное пособие/ Е.С. Скобликова - 3-е издание. М.: Флинта: Наука, 2006 - 264с.

18. Солганик Г.Я. Стилистика текста: учебное пособие/ Г.Я. Солганик - 7-е издание. М.: Флинта: Наука, 2006 - 256с.